Quezon City — Patunay ng patuloy na hangarin ng National Labor Relations Commission – National Capital Region (NLRC-NCR) na maghatid ng mabilis at makatarungang solusyon sa mga isyu sa paggawa, matagumpay na naisaayos ng Single Entry Approach (SEnA) Desk ang isang kasunduang nagkakahalaga ng ₱782,302.58 pabor sa tatlong Sales at Technical Coordinators ng isang manufacturing company.

Ang halagang ito ay kinabibilangan ng commissions, huling sahod, 13th month pay, service incentive leave pay, at holiday pay. Ang matagumpay na kasunduang ito ay naisakatuparan sa tulong ni SEnA Conciliator-Mediator Diana R. Rillo, na nagsilbing gabay sa parehong panig upang makamit ang makatarungan at kusang-loob na pag-aayos.

Sa ilalim ng SEnA program, nagbibigay ang NLRC ng mabilis, abot-kamay, at di-litigasyong paraan ng pagresolba ng mga isyu sa paggawa sa loob ng itinakdang 30-araw na mandatory conciliation-mediation period. Sa pamamagitan nito, naiiwasan ang mahabang kaso, napapanatili ang mabuting ugnayan sa pagitan ng mga manggagawa at employer, at natitiyak na natatanggap ng mga manggagawa ang kanilang nararapat na benepisyo nang walang pagkaantala.

Patuloy na naninindigan ang NLRC sa adbokasiyang pangalagaan ang karapatan ng mga manggagawa at isulong ang industriyal na kapayapaan, dahil naniniwala itong ang patas at maagap na paglutas ng mga sigalot ay nagpapalakas hindi lamang sa lakas-paggawa kundi pati na rin sa buong sektor ng negosyo.

#NLRC #HustisyaSaPaggawa #TagumpaySaKasunduan