Quezon City — Sa layuning palakasin ang kalusugan at kapakanan ng mga kawani, nakipagtulungan ang National Labor Relations Commission (NLRC) sa Philippine Health Insurance Corporation (PhilHealth) para sa unang hakbang ng pagpapatupad ng Yaman ng Kalusugan Para Malayo sa Sakit (YAKAP) program. Isinagawa ang oryentasyon ukol sa Universal Health Care Law at mga benepisyo ng YAKAP para sa mga opisyal at empleyado ng NLRC noong Agosto 12, 2025, onsite at online, na dinaluhan ng 188 kalahok mula sa Main Office at iba’t ibang Regional Arbitration Branches.

Ang YAKAP ay pinalawak na bersyon ng dating Konsultasyong Sulit Tama (Konsulta) program ng PhilHealth, na nag-aalok ng mas malawak na hanay ng primary care benefits. Kabilang dito ang libreng konsultasyon, itinakdang laboratory tests, cancer screening, at mga reseta ng mahahalagang gamot. Layunin ng programa na hikayatin ang pag-iwas sa sakit, maagang pagtuklas, at mas aktibong pangangalaga sa kalusugan.

“Ang pagpapatupad ng YAKAP ay alinsunod sa Universal Health Care Law na nagsisiguro na ang bawat Pilipino ay may agarang karapatan at akses sa serbisyong pangkalusugan — hindi lamang para sa paggaling kundi para rin sa pag-iwas at pagpapaunlad ng kalusugan,” pahayag ni Muriel Mirafuentes, Marketing Officer ng PhilHealth Local Health Insurance Office sa Quezon City. Dagdag pa niya, saklaw na ng YAKAP ang mas maraming serbisyo gaya ng basic at specialty laboratory tests, cancer screening, at 21 uri ng gamot para sa mga karaniwang at malalang karamdaman.

Para makapagparehistro, maaaring gumamit ang mga miyembro ng PhilHealth Member Portal, eGov PH mobile app, o bumisita sa alinmang local health insurance office o accredited facility. Makikita rin sa opisyal na website ng PhilHealth ang kumpletong listahan ng accredited YAKAP clinics.

Sa nasabing programa, sina Dr. Alberto Ong, Jr. at Earl Justin Sy mula sa Fe Del Mundo Medical Center Primary Care Clinic by Damiana — isang accredited YAKAP provider — ay nagbahagi ng mga serbisyong inaalok. Kabilang dito ang libreng pang-araw-araw na konsultasyon, basic at advanced laboratory tests, at maintenance medicines para sa hypertension, diabetes, dyslipidemia, at asthma.

Sa kanyang pambungad na salita, nagpasalamat si NLRC Fourth Division Executive Clerk of Court II Atty. Purdey Perez sa PhilHealth at Fe Del Mundo Medical Center at hinikayat ang mga kawani na lubos na pakinabangan ang programa.

“Sa pamamagitan ng programang YAKAP, nais nating matiyak na bawat isa ay may sapat na kaalaman upang mapangalagaan ang sariling kalusugan, maiwasan ang malubhang karamdaman, at magkaroon ng mabilis at abot-kayang akses sa serbisyong medikal. Hinihikayat po natin ang lahat na maging bukas sa pagtanggap ng bagong impormasyon, magtanong, at makibahagi sa talakayan, upang lubos nating mapakinabangan ang mga benepisyong handog ng programang ito para sa ating sarili, pamilya, at opisina. Tandaan po natin na ang kalusugan ng bawat kawani ay lakas ng buong NLRC,” ani Perez.

Sa matagumpay na pagsasagawa ng oryentasyon, layon ng NLRC at PhilHealth na mas marami pang kawani ang magparehistro at aktibong makibahagi sa YAKAP program — tungo sa mas malusog, mas matatag, at mas handang maglingkod na puwersa ng gobyerno.

#NLRC #PhilHealth #YAKAPProgram